مسحت النص هنا مرتين
كل ما أكتب ألاقي الكلام مسهب وملوش غرض
أكتب عن الامتحان اللي عارفة اني ماجاوبتش فيه كويس
والبنت المشاغبة اللي بتعلق فشلها على الناس
ومعندهاش أي مانع تكون سبب ولو غير مباشر في فشل غيرها
الكتب اللي اشتريتها
النضارة اللي كنت عايزة أشتريها
عشان مرسوم عليها خريطة بس مالاقتش على وشي
النضارة اللي اشتريتها وماعجبتش حد!
التفكير في المستقبل بعد مكالمة زميلتي
الصداع اللي بيهاجم من غير ميعاد وبقى عبء على تركيزي
الطريق للبيت اللي مكانش طويل قوي النهاردة
النوم ساعات طويلة تفصلك عن كل شئ
وتصحى تحس إنك في يوم تاني رغم إنه نفس اليوم
الفيلم اللي شفته قبل كده كذا مرة
عن مؤلفة بتكتب رواية وتكتشف إن البطل حقيقي فيها
تخيلي إني ممكن أشبهها
فكرة الغش بطريقة شفرة مورس اللي افتكرتها فجأة
واللي جتني الأسبوع اللي فات في الامتحان
الرواية اللي بقراها واللي خباها أخويا بس عشان يضايقني
بس هكملها الكتروني عادي
كل حاجة دلوقتي عجيبة فعلًا
أما تتفرج على حياتك من بره
من بعيد
كأني مش أنا!
وده مش هينفع يكون تشبيه بليغ!
No comments:
Post a Comment